[align=center]
بسم الله الرحمن الرحيم

السلام عليكم ورحمة الله وبركاته
[/align]

[align=center][/align]



[align=center]الحلقة الأولى[/align]


[align=right]
في بيتها ، جلست أم سعيد ترشف القهوة بتلذذ ، من تحت برقعها السميك ، وهي تقول :

ــ ما شاء الله .. دومها غاوية القهوة اللي أسويها .. تسلم إيدي .. وإلا إيش رايج يا أم سلوم ؟

لكن أم سلوم لم ترد عليها ، فقد كانت في سبات عميق ، ونوم ثقيل ، مما جعل أم سعيد تضحك وتقول :

ــ انتي ما حصلتي غير أم سلوم تسأليها يا أم سعيد ؟ .. هذي حرمه عيوز .. old woman .. ما تستحمل تيلس شوي إلا وتنام .. يا حليلها !

قالت أم سعيد في عصبية :

ــ ما مداها تيلس ها الأولد مومن .. توها داخلة البيت .. عافانا الله .

ثم صدر فجأة صوت طنين من لاب توب أم علاوي ، فحملته ، وجعلت تضرب الأزرار بسرعة وهي تقول :

ــ الحمد لله .. جتني رسالة إن الأسهم ارتفعت في البلاد .. الله يزيد ويبارك .

رشفت أم سعيد قهوتها وقالت :

ــ انت حرمة ما عندك شغلة غير هالأسهم وهاللبتب .. بسك وانتبهي حق عيونك شوي .. راح تعورين يا حرمه .

ضحكت أم علاوي وقالت :

ــ لا يا أم سعيد .. هذا اسمه لاب توب .. ما لبتب .. وبعدين هاللاب توب متطور ، وعلى شاشته واقي يمنع الأشعة إنها توصل للعين ، يعني شاشة بلازما ، و ...

لكنها سكتت حينما صدر طنين جديد من اللاب توب ، فقالت :

ــ هاي رسالة ثانية وصلتني عن طريق الإيميل .. الله العالم من منو !

ومع نهاية حروف كلماتها ، ارتفعت فجأة طرقات مألوفة من الباب ، يخالطها صوت يقول :

ــ افتحوا الباااااااب .. أنا جييييييت .

تنهدت أم سعيد في ضيق وقالت :

ــ هالحرمة بتكسر الباب يوم واحد .. الله الكافي بس .

ثم صاحت :

ــ دشي يا أم خماس .. الباب مبطل .. أنا ما أروم أقوم أفتح الباب لأن ركبتي تعورني .

اندفعت أم خماس إلى الداخل وهي تصيح :

ــ شو من عيايز انتو ؟ .. يالسين أربع وعشرين ساعة في هالبيت خايسين .. طلعوا .. شوفوا الدنيا .. اتفسسسسسحوا على قولة المصرييييين .

ثم جلست بالقرب من أم سلوم النائمة وصرخت :

ــ قووووومي .. نشي يا حرمة .. أربع وعشرين ساعة نايمة .. ما صارت ولا استوت .

فتحت أم سلوم نصف عينيها ، وقالت :

ــ ليش ؟ .. احنا وصلنا ؟

صاحت أم خماس :

ــ قومي .. نشي .. بسك أحلام .. وين وصلنا الحين ؟

قالت أم سلوم :

ــ المريخ .. وصلنا المريخ .. ما مدانا نوصل .. تونا راكبين الحمار .

قالت أم خماس :

ــ أي مريخ وأي حمار يا حرمه ؟ .. نشي يالله .. انتي في بيت أم سعيد .

تنهدت أم سلوم وقالت :

ــ يعني رجعنا .. الحمد لله .. خلاص ، أنا برتاح شوي من السفر ، وباخذ لي شوية نومة .

ثم عادت من جديد إلى نومها .

صرخت أم خماس :

ــ يا ربي .. شو هالحرمه ؟ .. أنا يوم واحد بتجيني جلطة منها .. شوفوا لي حل وإلا بنتحر يا نااااس .

قالت أم سعيد :

ــ خليها على راحتها يا أم خماس .. ما يصير تزعجينها من نومتها .. وبعدين انتي شو سالفتج اليوم ، وين كنتي ؟ .. من الصباح ما حد شافج .

قالت أم خماس :

ــ شو أسوي .. ملييييت .. من خمسين سنة واحنا جالسين ف هالفريج ، لا نطلع ولا نسير رحلات .. شو هالحياة ؟ .. مليت ، ورحت أتمشى .. ما عندنا سوبرماركت ولا كارفور في الفريج ، فرحت عند دكان آغا أدور على شي أشتريه أتسلى فيه .. أول ما شافني هالتيس آغا على طول يحاسبني على الديون اللي علي .. شو أسوي ؟ .. الحياة صعبة ، وخماس ولدي في أمريكا ما رجع للحين .. وما يرسل لي غير اللي يالله يكفي أسبوع وإلا أسبوعين .. حالة تقصر العمر .

قالت أم سعيد :

ــ شو هالكلام يا أم خماس .. ولدك كلما يتصل يبا يرجع انتي بروحج تقولين له لا ترجع ، وخلك هناك حتى تجيب الشهادة .. صار ماخذ الدكتوراه عشرين مرة وانتي بعدج رافضة إنه يرجع .. وبعدين هو تووه غاد لج كم ألف من يومين .. كيف تقولين انه ما يرسل لج فلوس ؟

عقدت أم خماس حاجبيها وقالت :

ــ وانتي شو عرفج بهالسالفة ؟ .. منو قال لج ؟

هنا صاحت أم علاوي وهي تعدل نظارتها أمام عينيها :

ــ سمعوا هالسالفة .. وصلني إيميل جديد .

قالت أم خماس وهي تصرخ :

ــ وانت وش وراج غير هالإيميلات والكمبيوتر والأسهم .. طفرتينا معاج .

قالت أم علاوي وهي تضرب أزرار اللاب توب :

ــ لا .. هالمرة غير .. الرسالة هاي جاية لنا احنا الأربعة .

قالت أم خماس :

ــ أكيد عندهم عرس ويريدون مني أطبخ لهم أحلى أكلة من مطبخ أم خماس بنت المحماس ، صاحبة الملاس .. وأكيد يريدوني أغني لهم أم علاية .. لكن قولي لهم إني ما أقبل بأقل من ألف درهم ، و ...

قاطعتها أم سعيد وهي تقول :

ــ سكتي شويه يا حرمة .. سكتي .. خل نسمع شو تقول هالرسالة .. عافانا الله .

قالت أم علاوي :

ــ هذي رسالة من شباب ينتمون إلى منتدى جديد ، لكنه ما شاء الله عليه نجح من بدايته ، والناس مقبلين عليه إقبال شديد .. واللي أنشأ المنتدى طبعا يسكن منطقة خصب ، عشان كذا سمى منتداه باسم منتدى خصب .

قالت أم سلوم بصوت ناعس :

ــ مرتضى عمر منو ؟ .. أول مرة اسمع عنه .

قالت أم علاوي :

ــ لا يا أم سلوم .. منتدى خصب .. هم عازمينا عشان نزورهم .. شو رايكم ؟

قالت أم خماس :

ــ يعني بنروح رحلة حق خصب .. ياااااا سلااااام .. أخيييييرا بنطلع من هالقرقور .. أخيييييرا بنشوف دنيا غير هالدنيا .

قالت أم سعيد :

ــ لا لا لا لا لا .. أنا ما أروم .. ركبتي تعورني .. ما أروم أسير خصب .. انتو ما سمعتوا عن الطريق من راس خيمة لخصب .. هذا يعور الراس ، ويخلي الواحد يتزاوع .. لا ما أروم .

قالت أم سلوم :

ــ وأنا بعد .. ما أعوم .. البحر كبير والناس زحمة .

قالت أم سعيد :

ــ شو أعوم ما أعوم .. أنا قلت ما أروم .. انت وين واحنا وين يا أم سلوم ! .. نشي وسمعينا عدل لا يستوي فيج شي لا صار ولا استوا .

قالت أم سلوم :

ــ لا يا أم سعيد .. ما أريد دوا .. أنا ما مريضة .. بسم الله علي .. شو هالكلام .. ليش تتفاولين علي ؟

قالت أم علاوي :

ــ ليش ما تريدين تجين ويانا خصب يا أم سعي ؟ .. هاي بتكون رحلة حلوة .. هناك بحر ، وجبال ، وشوية خضرة ، وطبيعة خلابة .. يمكن الشارع يعور الراس شوي ، لكن في انلهاية راح توصلين لمنطقة روعة ما شاء الله عليها .

تنهدت أم سعيد وقالت :

ــ انزين .. بجي وياكم .. بس إياني وإياكم تقولوا لي صعدي اليبل .. لو تموتون ما أصعد .

ثم سكبت شيئا من القهوة ، وقالت :

ــ يالله .. شربوا معاي هالقهوة الغاوية .

نهضت أم سلوم من نومها في سرعة وقالت :

ــ أنا بترخص عنكم .. السلام عليكم .

وأغلقت أم علاوي اللاب توب وقالت :

ــ وأنا بعد .. تذكرت شي مهم لازم أسويه .

وقامت أم خماس من مجلسها وصاحت :

ــ لااااااااا .. انتظريني يا أم سلوم .. أنا يايه وياج .

قالت أم سعيد بعد أن بقيت لوحدها :

ــ والله انتو ناس ما تقدرون القهوة الغاوية .

وانتهت الجلسة .. ولكن القصة لم تبدأ بعد .

الحلقة الثانية
اللقاء الأول[/align]

[align=right]
انطلقت سيارة من نوع اللاند كروزر تجوب شوارع دبي ، بسرعةٍ لا تتعدى العشرة أمتار في الثانية ، بسبب كثرة التحويلات والتصيلاحات الموجودة هناك ، وتتوقف كل خمس ثوان عند إشارات المرور .

قالت أم خماس وهي في المقعد الخلفي للسيارة :

ــ شو هااااااا ؟ .. احنا متى بنوصل ؟ .. صار لنا أسبوع واحنا في هالسيارة !

قالت أم سعيد :

ــ صبري شويه .. شو فيج ؟ .. كلها يومين زيادة وبنوصل ؟

ضحكت أم علاوي وقالت :

ــ ما شاء الله عليكم .. روحكم المعنوية مرتفعة اليوم .. أشوفكم تنتكتون .

قالت أم خماس :

ــ شو نسووي .. من القهر اللي فينا .. عيل من فريج لفريج في دبي يبالنا كل هذا الوقت ؟!

قالت أم علاوي :

ــ هذا شي لصالح أهل البلد ، لأن الحكومة يالسة تطور الشوارع والـ ...

صرخت أم خماس تقاطعها :

ــ خل يطورون دكاكينهم بالأول .. خل يشوفوا الأسعار كيف مرتفعة .. أمس رحت أشتري عند ( آغا ) القشة اللي قصمت ظهر الفيل ؛ قال لي بخمسين درهم .. شو خمسين درهم ؟ .. هو كله على بعضه ما يسوى خمس دراهم .

قالت أم سعيد في عصبية :

ــ انت بعدك في القشة اللي قصمت ما أدري شنو وقصمت ما أدري شنو ؟ .. يوزي يا حرمه عن هالخرابيط .. عافانا الله .

هنا استيقظت أم سلوم من نومها وهي تقول :

ــ هاه .. وين وصلنا الحين ؟

أجابتها أم علاوي :

ــ قريب بنوصل حق أعضاء منتدى خصب نت .. ما باقي غير دقايق .

قالت أم سلوم مستغربة :

ــ أي أعضاء يا أم علاوي ؟ .. أنا كنت أظن إنا في طريجنا حق القرية العالمية ! .. انتو غيرتوا رايكم وإلا شو ؟

صرخت أم خماس :

ــ واااااي منج يا أم سلوم .. جبتي لي الجلطة .. أحسن لي أسكت عنج وما أوجع راسي وراج .

هنا تكلم السائق لأول مرة وهو يقول :

ــ بس ماما .. لا يسوي جرجر واجد ماما !

استغرب الجميع ، وصاحت أم سعيد :

ــ انت شو تسوي هنيه ؟ .. احنا ما في قطعة 13 !

قال السائق :

ــ أنا ضيف هلقة ماما .. لا يسوي جرجر واجد .

وصلت السيارة أخيرا ، فنزل الجميع منها ، ليتطلعوا إلى خيمة متهدمة على الآخر ، ولم يبق منها سوى لوحة مرمية على الأرض مكتوب عليها : ( سهران .. ملان .. طفران .. عندك علوم وهذرة زايدة .. تال وسولف ويانا هنيه ) .. وفي أسفل من هذه العبارة مكتوب : ( مجلس الهذربان ) .

خرج من تحت أنقاض الخيمة مجموعة من الشابات ، وركضت إحداهن إلى أم سلوم وهي تبتسم وتقول :

ــ أم سلوم .. حبيبتي .. أخيرا شفتج .. أخيرا بجلس وياج .. أخيرا أقدر أقول لصاحباتي إني كلمت أم سلوم .

قالت أم سلوم :

ــ منو أم سلوم هاي ؟

أجابتها البنت وهي تبتسم :

ــ انت أم سلوم !

قالت أم سلوم مبتسمة :

ــ إييييه .. نسييييت .. مرحبا بج يا بنتي .. لكن منو انت ؟!

أجابت البنت مبتسمة :

ــ أنا حياتي حلوة .. ويسموني في البيت أماني .

هزت أم سلوم رأسها وهي تقول :

ــ إيييه .. زين قلتي لي .. لكن سلامات .. ليش تبتسمين ؟

قالت حياتي حلوة :

ــ أبتسم لأن الحياة رحلة لطيفة .

ومن جهة أخرى ، اتجهت شابة أخرى نحو أم سعيد وهي تحتضنها وتقول :

ــ ما شاء الله .. شاعرتنا أم سعيد هنيه ! .. والله قسمي في المنتدى راح يكبر أكثر وأكثر بوجودج .

قالت أم سعيد في ضيق :

ــ أنا ما شاعرة ولا شي .. أنا بس أردد أشعار زمان أول .. لكن منو انت ؟

قالت البنت :

ــ أنا ريم الفلا .. ما عرفتيني ؟

تساءلت أم سعيد :

ــ ومن وين أعرفج ؟ .. زوريني وشربي عندي قهوة في بيتنا وبعدين قولي لي أعرفج وما أعرفج .

قالت ريم الفلا :

ــ أنا أحبج وااااايد .

ترقرقت عينا أم سعيد بالدموع وقالت وهي تحتضنها :

ــ يا حليلج .. حتى أنا بديت أحبج .

أما الشابة الثالثة فتقدمت نحو أم علاوي وقالت لها مصافحة :

ــ هلا ومراحب أم علاوي .. والله لج شوووق كثيييير .. من زمان وأنا أتمنى أشوفج .. لكن الحمد لله إني أخيرا شفتج .. ما عرفتيني ؟ .. أنا مارينا .

صافحتها أم علاوي وهي تقول :

ــ هلا وغلا حبيبتي .. والصراحة الشوق متبادل .. وكنت أتمنى نلتقي من زمااان .

هنا تنحنحت أم خماس وقال :

ــ أحم أحم .. نحن هنا .

التفت الجميع إليها للحظات ، ثم عادوا إلى حديثهم ، كل واحدة منهن تحادث صديقتها .

صرخت أم خماس :

ــ شو فيكم يا نااااس ؟ .. قلنا لكم احنا هنا .. إيش فيكم ما تسمعون ؟ ..أنا أم خماس ، وما حد رحب فيني ولا قال لي كلمة واحدة حلوة .

قالت حياتي حلوة وهي تبتسم :

ــ ايش فيج يا أم خماس .. لا تعصبي .. الحياة رحلة حلوة ولطيفة .. ابتسمي .. اسقعي .

صرخت أم خماس في عصبية :

ــ شو أبتسم شو أسقع ؟ .. أنا جالسة في الأسكيمو وسقيع البرد حولي وأنا ما أدري ؟

قالت ( مارينا ) محاولة تهدئة أعصاب أم خماس :

ــ لا تزعلين يا أم خماس .. احنا كلنا نحبج .

قالت أم خماس :

ــ كلا وألف كلا .. انتو لو تحبوني يا ( ياماها ) كان ظهر فيكم من أول ما جيتكم .

بدت العصبية على ملامح ( مارينا ) وهي تقول :

ــ أنا أسمي ( مارينا ) .. ما ( ياماها ) .

قالت أم خماس :

ــ ماكو فرق .. كلهم طراريد .

هنا برزت شابة أخرى من تحت أنقاض خيمة الهذربان وهي تتجه نحو أم خماس وتصيح فيها :

ــ أم خماس هنيه ؟ .. ليش ما خبرتوني ؟ .. يا هلا يا هلا بأم خماس .. أنورت وأزهرت .. أخييييرا شفتج يا أم خماس .

هنا ابتسمت أم خماس وركضت نحو البنت تحتضنها وتقول :

ــ إييييه .. أنا هنيه .. أكيد اشتقتي لي ؟

ثم احتضنتها بقوة وهي تحادثها :

ــ حتى آآآآآآنا أحبج .. ومشتااااااقة لج .. وولهاااااااانة علييييييج .. ليش ما زرتيني في بيتنا .. الفريج تراه ما بعيد .. انت روحي واسألي عن أم خماس صاحبة مطبخ المحماس ، وكلهم راح يدلوكي على البيت .. ها ! .. شو صار لج ؟ .. ليش ساكتة ما تتكلمين ؟

هنا انطلق الجميع ينقذون البنت من ذراعي أم خماس ، ثم أجلسوها على الأرض وهي تكاد تختنق .. وريم الفلا تهتف :

ــ بنت راك .. انت بخير حبيبتي ؟ .. تكلمي !

وصاحت حياتي حلوة وهي تبتسم في بكاء :

ــ بنت راك .. لا تموتي يا بنت راك .. انت صديقتي العزيزة .. منو اللي يبهدلني ويستولي على كمبيوتري في يوم الجمعات لما نلتقي لو متي ؟ .. من اللي يبقى لي من بعدج يا بنت راك ؟ .. لا تموتي ، ترا الحياة حلوة ، فلا تقطعي رحلة الحياة اللطيفة بسبب أم خماس .

في حين هتفت مارينا في وجه أم خماس :

ــ شو سويتي فيها ؟ .. جذيه الناس يحضنون ؟ .. شوي شوي على البنت ؟

قالت أم خماس مدافعة عن نفسها :

ــ أنا ما سويت شي .. أنا بس حضنتها .. أنا شو يخصني إذا هي ما تستحمل يا ( ياماها ) ؟

صرخت مارينا في غضب :

ــ أنا أسمي مارينا .. ماااااااريييييينااااااا .. حفظتيه وإلا بعدج ؟

رويدا رويدا بدأت بنت راك تفيق من إغفاءتها ، وسعلت قليلا ، قبل أن تنهض على قدميها وتقول :

ــ لا لا .. أنا بخير .. أم خماس حبيبتي ما لها شغل .. أنا بس شوية ما قدرت أستحمل جسمها الـ ...

لكنها لم تكمل عبارتها ، فصرخت أم خماس :

ــ جسمها الـ ... شنو ؟ .. كملي هاه .. انتو أصلن ما عندكم نظر ، وجسمي هذا رشق ، وبشرتي صاااافيه .. لكن عيونكم اللي فيه وسخ وما تشوفون عدل .

اتجهت ريم الفلا إلى أم خماس وقالت لها :

ــ أكيييييد يا أم خماس .. انتي الحلا كله .. وانتي الزين اللي ما يخفى عن العين .. وانت القمر ، وهل يخفى القمر يا أم خماس ؟

تنحنحت أم خماس وقالت :

ــ أخجلتم تواضعنا .

ثم نظرت أم سعيد إلى أنقاض الخيمة وتساءلت :

ــ وشو هالكركبة ؟ .. شو صار هنيه ؟ .. زلزال مر عليكم وإلا شو ؟

ضحكت حياتي حلوة في حزن ، وتنهدت ريم الفلا في ضيق ، وزفرت بنت راك في عصيبة .. في حين قالت مارينا في رزانة وهدوء :

ــ مشاكل في المنتدى .. السيرفر اللي المنتدى معتمد عليه عشان يحتضنه تعرض لهجوم هكر ، فأدى هذا إلى إن بعض البيانات في قاعدة البيانات تنحذف .. ومنها موضوع هالميلس ( الهذربان ) .. كان موضوع حلو ، لكن قضاء الله وقدره فوق كل شيء .

قالت بنت راك متابعة :

ــ لكن مهما صار ، فالمنتدى بعده بخير .. وهالخيمة راح نبنيها من أول وجديد .

قالت أم علاوي مبتسمة :

ــ أهم شي انكم ما تيأسون .. وبهمتكم راح يرجع كل شي لمكانه الطبيعي ، وكأن شي ما صار .

ضحكت أم سعيد وقالت :

ــ كل هذا حلو .. لكن شو ؟ .. بنظل على طول هنيه ؟ .. ما بتخلونا نتفاول ؟

وقالت أم سعيد :

ــ وأهم شي القهوة .. وإذا ما مسوين قهوتكم ترا أنا قهوتي غاوية وجاهزة .. دلتي أنا ما أودرها وين ما رحت .. على طول وياي .

قالت بنت راك :

ــ أفا عليكم بس .. الفوال موجود ، والقهوة جاهزة .. قربوا قربوا .

وقالت ريم الفلا :

ــ بنتفاول الحين .. وبعد الفوال على طول بنركب اللاند كروزر وبنسير لخصب .. هناك بنلتقي بأعضاء المنتدى الباقين .

وبدأوا يتضاحكون .. ولكن القصة لم تبدأ بعد !
[/align]

[align=center]
يتبع
[/align